KİTABXANADA «HEYDƏR ƏLİYEV VƏ AZƏRBAYCANÇILIQ MƏFKURƏSİ»
ADLI ELMİ KONFRANS KEÇİRİLMİŞDİR
8.12.2006 [12:00]
Dekabr ayının 8-də AMEA-nın Mərkəzi Elmi Kitabxanasında Ümummilli lider Heydər Əliyevin vəfatının ildönümü ilə əlaqədar anım mərasimi- «Heydər Əliyev вə Azərbaycançılıq Məfkurəsi» adlı elmi konfrans keçirilmişdir. Tədbiri giriş sözü ilə açan Mərkəzi Elmi Kitabxananın direktoru Aybəniz Əliyeva-Kəngərli qonaqları salamlamış və bir dəqiqəlik sükut ilə ulu öndərin xatirəsi ehtiramla anılmışdır.
Öz çıxışında Aybəniz Əliyeva Kəngərli ulu öndərin həyat yolundan, fəaliyyətindən söz salmış, respublikamızın dünya miqyasında tanınmasında, Ermənistan-Azərbaycan, Dağlıq Qarabağ münaqişəsinin əsil mahiyyətinin dünya ictimaiyyətinə çatdırılmasında, həyatımızın bütün sahələrində sürətli inkişafın əldə olunmasında böyük xidmətlərini vurğulamışdır. O söyləmişdir ki, ümummilli liderimiz Heydər Əliyev hələ sağlığında xalqının ürəyində özünə əbədi abidə ucaltmış dahi şəxsiyyətdir. Ulu öndərin xatirəsi qədirbilən xalqımızın qəlbində həmişə yaşayacaqdır. Çünki onun ideyaları, fikirləri, arzuları yaşayır, onun başladığı siyasi xətt bu gün Prezident İlham Əliyev tərəfindən layiqincə davam etdirilir.
Daha sonra «Fenomenal şəxsiyyət Heydər Əliyevin nitq mədəniyyəti» adlı məruzə ilə çıxış edən Bakı Dövlət Universitetinin müəllimi Aygün Eyvazlı H.Əliyevin parlaq zəkası və natiqlik istedadı ilə Azərbaycan dilini çoxlarına yenidən sevdirməsindən danışmışdır.
Mərkəzi Elmi Kitabxanada fəaliyyət göstərən «Azərbaycan Dövlətçiliyi və Heydər Əliyev kitabxanası»nın müdiri Gülşən Əliyeva da tədbirdə çıxış edərək Heydər Əliyevin Azərbaycançılıq konsepsiyasında ədəbiyyat məsələləlrindən söz açmışdır.
Tədbirdə bir sıra qonaqlar, kitabxananın və AMEA-nın əməkdaşları, eləcə də, mətbuat nümayəndələri iştirak etmişlər.
