29 mart 2007-ci il tarixdə AMEA Mərkəzi Elmi Kitabxanası Tarix İnstitutu ilə birgə “Azərbaycan xalqının faciəvi tarixi” mövzusunda konfrans-sərgi keçirdi. Sərgidə ermənilərin azərbaycanlılara qarşı törətdiyi soyqırım faktlarını əks etdirən materiallar öz əksini tapmışdır. Burada 31 Mart soyqırımı ilə yanaşı, Xocalı, Malıbəyli faciələrindən, eləcə də erməni terrorundan bəhs edən sənədlər, rus, şərq və avropa dillərində nəşr olunmuş 200-dən artıq ədəbiyyat nümayiş etdirildi. Tədbiri giriş sözü ilə açan AMEA Tarix İnstitutunun direktoru, tarix elmləri doktoru, professor Yaqub Mahmudov qeyd etdi ki, 31 Mart azərbaycanlıların qan yaddaşından silinməməlidir. O bildirdi ki, 1918-ci ildə Rusiyada yaranmış vəziyyətdən istifadə edən ermənilər öz istədiklərinə bolşevizm bayrağı altında nail olmağa cəhd edərək cinayətkar planlarını həyata keçirmək məqsədilə Bakıya soxulub, azərbaycanlıların evlərinə basqınlar edib, onları vəhşicəsinə öldürüblər. Professor qeyd etdi ki, Bakıda törədilən bu qətliamlar eynilə Şamaxı, Quba-Xaçmaz, Lənkəran, Hacıqabul, Səlyan, Zəngəzur, Qarabağ, Naxçıvan və digər bölgələrdə də edilib. 1918-ci ilin mart-aprel aylarında 50 min azərbaycanlının qətlə yetirildiyini, 10 minlərlə insanın öz torpaqlarından qovulduğunu söyləyən Y.Mahmudov bidirdi ki, 1998-ci il martın 26-da ümummilli lider Heydər Əliyevin imzaladığı fərmanla “31 mart - Azərbaycanlıların Soyqırımı Günü” elan edilib və 80 ildən sonra xalqımız nəhayət ki erməni vəhşiliyini dövlət səviyyəsində yad etməyə ehtiyac duydu. Sonra çıxış edən tarix elmləri namizədləri İsrafil Məmmədov və Sevil Piriyeva, elmi işçilər Vaqif Abışov və Zəfər Kərimov ermənilərin azərbaycanlılara qarşı törətdiyi vəhşiliklərdən danışdılar.

foto